Кыргызстандын көк бөрү федерациясы казакстандык спортчуларды 1-ноябрда Ысык-Көлдүн жээгинде «Биримдик» кубогун өткөрүүгө чакырды. Бул тууралуу аталган федерациянын жетекчиси Рамис Жунусалиев билдирди.
«Талаштуу маселелерди жоюу үчүн казак тарапка реванш өткөрүүнү сунуштайбыз. Коңшу өлкөнүн спортчуларын «Биримдик» мелдешине катышууга чакырабыз», — деди ал.
Сунуш Кыргызстан менен Казакстандын ортосундагы спорттук байланышты чыңдоого, ошондой эле калыс оюнду камсыздоого багытталган.
Эске сала кетсек, Астанада (Казакстан) өткөн Дүйнөлүк көчмөндөр оюндарында көкпар (жер улак) турниринин финалында мушташ чыгып, беттеш токтотулган. Биринчи таймдын 13-мүнөтүндө кыргызстандыктар эсепти 3:1 кылып өз пайдасына чечишти. Казакстан Республикасынын курама командасынын оюнчусу Улан Байтөреев кыргыз оюнчусу Кубанычбек Султан уулун камчы менен чаап жиберген. Ушундан кийин мушташ башталды.
