Кыргызстанда бүтүрүүчүлөр үчүн Бүткүл республикалык тестирлөөнүн экинчи жана үчүнчү этаптары аяктады. 21-23-июнга чейин жүйөлүү себептер менен ЖРТга катышпай калгандар үчүн кечирээк тестирлөө жүргүзүлөт. Азыр көптөгөн абитуриенттер үчүн окууга кайда барарын тандоо маселеси алдында турат.
Жакында республикада биринчи улуттук изилдөө жүргүзүлүп, жогорку окуу жайларынын рейтинги түзүлдү. Жыйынтыгын Билим берүү жана илим министрлиги сунуштады.
Университеттер алты критерий боюнча бааланды. Рейтингдеги жети лидердин катарына өзгөчө статуска ээ алтоо — КММА, КМТУ, КУАУ, КУУ, КРСУ, ОшМУ кирди. Иса Ахунбаев атындагы Кыргыз мамлекеттик медициналык академиясы 461,56 упай топтоп, биринчи орунду ээледи.
Изилдөөгө өлкөнүн жалпысынан 27 университети катышты.
Белгилей кетсек, рейтингди түзүү иштери 2023-жылдын октябрында башталган. 2024-жылдын январынан бери EdNet агенттигинин сурамжылоосуна 1 миң 1 мугалим жана 507 иш берүүчү катышты.
