Кыргызстандын бокс боюнча курама командасынын мүчөсү Мунарбек Сейитбек уулу Парижде өтө турган Олимпиада оюндарына лицензия утту.
Сейитбек уулу Бангкокто өтүп жаткан боксчулар арасындагы лицензиялык турнирге 57 килограммга чейинки салмак ченинде катышты. Анда Париждеги оюндарга жалпы 3 жолдомо ойнотулду.
Кыргызстандык спортчу жарым финалга ийгиликтүү өтүп, индиялык боксчу Сачин менен беттешип, аны жеңип алды. Бул жеңиш кыргызстандык спортчуга бул салмак категориясында Олимпиада оюндарына акыркы лицензияны жеңип алууга мүмкүндүк берди.
Эскерте кетсек, буга чейин кыргызстандык спортчулар Олимпиада оюндарына катышуу үчүн 13 жолдомо алышкан. Быйыл Олимпиада оюндары 26-июлдан 11-августка чейин Париж шаарында өтөт. Медаль үчүн спорттун 45 түрү боюнча 206 өлкөдөн 10 миңден ашык спортчү күч сынашат.
