Мамлекеттик ипотекалык компанияда үй алууга 23 миң 500 үй-бүлө кезекте турат. Бул тууралуу «Ишеним» фракциясынын жыйынында мекеменин башкармалыгынын төрагасынын орун басары Тилек Жээембаев билдирди.
Анын айтымында, акыркы үч жылда МИК 4 миң үй-бүлөнү турак-жай менен камсыздаган, ага 9 миллиард 600 миллион сом сарпталган. Ал эми компания түптүлгөндөн, тагыраагы 2015-жылдан баштап бүгүнкү күнгө чейин 9 миң 500 үй-бүлөгө үй берилип, 16 миллиард 200 миллион сом сарпталган.
«Учурда «Социалдык ипотека» категориясы боюнча 2 миң адам, жеңилдетилген ипотека боюнча 16 миң 800 адам, жеткиликтүү ипотека боюнча 4 миң 400 адам кезекте турат», — деди Тилек Жээмбаев.
