Чүй облусунда дача айылдарында жер мунапысы башталды. Бул тууралуу президенттин облустагы ыйгарым укуктуу өкүлчүлүгү кабарлады.
Маалыматка ылайык, президенттин Чүй облусундагы ыйгарым укуктуу өкүлү Канат Жумагазиев дача кооперативдеринин башчылары менен жолугушуп, аймактагы жер мунапысынын жүрүшүн талкуулады.
Кооперативдердин өкүлдөрү дача айылдарынын жашоочулары туш болгон көйгөйлөрдү айтышты. Алардын эң негизгиси — каттоонун жоктугу. Калктуу конуштун статусу жок болгондуктан, фельдшердик-акушердик пункттарды, мектептерди, бала бакчаларды жана башка социалдык объектилерди куруу мүмкүн эмес. Мындан тышкары алардын айтуусу боюнча, тургундар өз каражаттарына электр станцияларын орнотуп, жолдорду жана көпүрөлөрдү курууга аракет кылышууда.
Канат Жумагазиев президенттин демилгеси менен республикада жер мунапысы ийгиликтүү өтүп жатканын айтты.
Тактап айтканда, Чүй облусунда мунапыстын алкагында жарандардан 41 миң 820 арыз келип түшкөн, анын ичинен 26 миң 218и коомдук угуудан өтүп, жарандарга жер тилкелерин берүү боюнча 18 миң 748 чечим, 14 миң 438 мамлекеттик акт жана 3 миң 835 техникалык паспорт берилген.
Канат Жумагазиевдин айтымында, жаңы конуштарда жерге мунапыс берүү процесси ийгиликтүү аяктап, эми дача кооперативдеринин тилкелерин мыйзамдаштыруу убагы келди. Ал аймактын жашоочуларын алардын укуктук маселелерин чечүү жана өз аймагынын өнүгүшүнө шарт түзүү үчүн колунан келген аракеттерин жасаарын билдирди.
