Өзбекстандын Коргоо министрлиги Ми-8МТВ тик учагын ондоп, Кыргызстандын Абадан коргонуу күчтөрүнө өткөрүп берди.
23-октябрда президент Садыр Жапаров «Фейсбуктагы» баракчасына өлкө авиациясы эки аскердик тик учак менен толукталганын жазды.
Жапаровдун белгилешинче, 2021-жылы жетишилген макулдашууга ылайык, Өзбекстан Кыргызстанга кайтарымсыз гуманитардык жардам катары МИ-8МТВ тик учагын берген.
«Андан соң Кыргызстандын аскер тик учактар паркындагы дал ушундай тик учактардын бири Өзбекстандын «Чирчик авиациялык оңдоп-түзөө заводуна» толук капиталдык ремонттон өткөрүүгө берилген. Оңдоо иштерин гуманитардык негизде Өзбекстандын Коргоо министрлиги толугу менен моюнуна алган», — деп жазды Жапаров.
Кыргызстандын Коргоо министрлигинин адистери оңдолгон тик учакты өткөрүп алып, аны «Чирчик-Ош», «Ош-Бишкек» каттамы менен алып келишти. Тик учак толук кандуу өз ишин аткарууга даяр.
Жапаров бул иш Шавкат Мирзиёевдин колдоосу менен ишке ашканын белгилеп, ага ыраазычылык билдирди.
Андан мурдараак Садыр Жапаров 2016-жылы Орусия Кыргызстанга берген МИ-8МТВ-1 тик учагы алты жылдан кийин Беларуста оңдолуп кайра колдонула баштаганын кабарлаган.
