Иран АКШнын коронавируска каршы күрөшүүгө көмөк көрсөтүү сунушун четке какты. Бул тууралуу жекшемби күнү өлкөнүн руханий лидери Аятолла Али Хаменейи билдирди.
«Силерге эч ким ишенбейт. Жардам деп биздин өлкөгө вирусту күчөтө турган дары алып келишиңер мүмкүн», — деди Хаменейи.
Бир нече күн мурда АКШнын президенти Дональд Трамп Тегеран жардам сураса, эпидемияга каршы күрөшүүгө жардам берүүгө даяр экенин билдирген. Өз кезегинде Ирандын президенти Хасан Роухани бул сунушту дароо четке кагып, жардамдын ордуна Иранга киргизилген санкцияларды токтотууга чакырган.
Акыркы маалыматтар боюнча Иранда коронавируска чалдыккандардын саны 22 миңге жакындап, 1685 адам каза болду.
