Бүгүн Октябрь райондук соту Башкы прокуратуранын доо арызын канааттандырды. Башкы прокуратура «Заноза» басылмасы жана укук коргоочу Чолпон Жакупова президенттин кадыр-баркына шек келтирди деп, сотко кайрылган.
Президенттин баркы бул арызда 9 миллион сомго бааланган. Эми интернет басылманын негиздөөчүлөрү Нарын Айып менен Дина Маслова жана укук коргоочу, Жогорку Кеңештин мурдакы депутаты Чолпон Жакыпова 3 миллион сомдон төлөп бериши керек.
Эскерте кетсек, интернет басылма 3-мартта Акыйкатчы институту сөз эркиндигин коргоо үчүн уюштурган тегерек стөлдө Чолпон Жакыпованын айткан сөзүн жарыялаган. «Чолпон Жакыпова: Маниакалдык абалдагы кишинин тизгинин тыюу керек» -деген аталыштагы маалымат доо арызга себеп болду.
