Opta суперкомпьютери тайпалык этаптын биринчи турундагы оюндардан кийин футбол боюнча 2026-жылдагы дүйнө чемпионатында жеңишке жетүүгө негизги талапкерлердин рейтингин жаңылады.
Турнирдин башкы фаворити катары эми Франция курама командасы эсептелүүдө. Сенегалды 3:1 эсебинде ишенимдүү жеңгенден кийин «үч түстүүлөрдүн» чемпиондукту багындыруу мүмкүнчүлүгү 16,1 пайыз деп бааланууда.
Экинчи сапка дүйнөнүн азыркы чемпиону Аргентина көтөрүлдү. Түштүк америкалыктар титулун коргоону Алжирди 3:0 эсебинде жеңүү менен башташты. Беттештин башкы каарманы — хет-трик жасаган «Алтын топтун» сегиз жолку ээси Лионель Месси болду. Аргентиналыктардын жеңишке жетүү ыктымалдуулугу 12,6 пайызды түзөт.
Турнирдин ТОП-10 фаворити
Opta суперкомпьютеринин жаңыланган версиясы боюнча, чемпиондукка башкы талапкерлердин ондугу төмөнкүдөй:
- Франция — 16,1 пайыз;
- Аргентина — 12,6 пайыз;
- Испания — 12,5 пайыз;
- Англия — 10,2 пайыз;
- Португалия — 7,2 пайыз;
- Германия — 6,5 пайыз;
- Бразилия — 5 пайыз;
- Норвегия — 4,7 пайыз;
- Нидерланды — 3,3 пайыз;
- АКШ — 2,78 пайыз.
Эске сала кетсек, 2026-жылдагы дүйнө чемпионаты АКШ, Канада жана Мексиканын аймагында өтүп жатат. Турнир 11-июнда башталып, финалдык беттеш 19-июлда болот.
