Мамлекеттик мекемелерде жана соода борборлорунда бомба коюлду делген маалыматтар такталган жок. Бул тууралуу Бишкек шаардык ички иштер башкармалыгынын басма сөз кызматы билдирди.

Маалыматка ылайык ИИМдин кинологдору Жогорку, Октябрь, Биринчи май жана Ленин райондук сотторунун, Санариптик өнүктүрүү министрлигинин, Азия Молл жана Айчүрөк соода түйүндөрүнүн имараттарынан кандайдыр бир шектүү же жарылуучу заттарды тапкан эмес.

«Келип түшкөн бардык билдирүүлөр маалыматты катто журналына киргизилип, УКМКга өткөрүлүп берилет», — деп билдиришти мекемеден.

Эскерте кетсек, бүгүн Бишкек шаардык ички иштер башкармалыгынын «102» кызматына бомба коюлду делген маалыматтар түшкөн. Санариптик өнүктүрүү министрлигинин, Жогорку, Ленин жана Октябрь райондук сотторунун, ошондой эле Aзия Молл жана Айчүрөк соода борборунун имараттары курчоого алынып, эвакуацияланган.