Санариптик өнүктүрүү министрлигинин, Жогорку жана Ленин райондук сотторунун имараттарына бомба коюлду деген маалымат кабарланды. Бул тууралуу Шаардык ички иштер башкармалыгынын басма сөз кызматы билдирди.
Маалыматка ылайык билдирүү саат 9.00дө 102 номерине түшкөн.
«Окуя болгон жерге райондук башкармалыктардын жетекчилиги, тергөө-ыкчам топтору барды. Имараттардын ичинде жүргөн жарандар эвакуацияланып, аймактар курчоого алынып, тиешелүү кызматтар иш алып барууда», — деп билдиришти мекемеден.
Ошондой эле Asia Moll жана ЦУМ соода түйүндөрүндө да жарандар эвакуацияланып, имараттар курчоого алынганын 24.kg агенттигине Шаардык ички иштер башкармалыгынын басма сөз кызматынан тастыкташты. Имараттарга бомба коюлгандыгы тууралуу маалыматтар түшкөн.
Эске салсак, кечээ милицияга Бишкекте үч мектепте бомба бар деген маалымат кабарланган. Мындай маалыматтар борбордо жаз жана жай мезгилдеринде тарап, бардык учурларда билдирүүлөр жалган болуп чыккан.
