1-ноябрь- кыргыз милициясынын күнү. Жыл сайын бул датанын урматына өлкөнүн баардык аймактарында майрамдык иш-чаралар уюштурулуп, анда кызмат учурунда артыкчылык көрсөткөндөр сыйланышат.
Милициянын полковниги Азамат Асымов пенсияга чыкканына 3 жылдын жүзү болду. 23 жыл бою ыкчам кызматтарда эмгек өтөп, милициянын отличниги наамын алган. Учурда бир уул, бир кыздын атасы. Каарманыбыз 24.kg агенттигине коомдун күзгүсү болгон тартип сакчыларынын иши тууралуу маек куруп берди.
-Кесиптик майрамыңыз кут болсун! Бул кесипти кантип аркалап калдыңыз?
-Милиция кызматкери болом деген ой чынында жок эле, үй-бүлөөбүздө деле бул тармакта иштегендер жок. Бирок буйрук экен, 1994-жылы мектепти аяктаганда өзүм каалаган окуу жайга тапшырып, өтпөй калдым. СССР тараган кез, кыйын күндөр болчу. Ошентип кайра айылга кайтууга туура келген. Кийинки жылы милициянын жогорку мектебине тапшырып өтүп кеттим. Эргеш Алиев атындагы ИИМдин Академиясын 2000-жылы аяктадым.
Окууну бүткөндө Нарын облустук ички иштер башкармалыгынын карамагына жөнөтүштү. Алгачкы эмгек жолумду Кочкор райондук ички иштер бөлүмүнүн кылмыш иликтөө бөлүмчөсүндө ыкчам кызматкер болуп иштөөдөн баштагам.
Алгачкы жолу милициянын формасын кийгениңизде кандай сезимдер болду эле?
-Албетте, мурун кийип көрбөгөндөн кийин башкача сезимдер болот.
Биз окуп жүргөн убакта тартип катуу эле, форманы кир кылып, бырыштырып кийгенге тыюу салынчу, күндө эртең менен катарга тизилгенде биринчи формадан башталчу.
Жумуш үчүн жеке мен эле эмес, баардык тартип сакчылары курмандыкка барат, жарандардын коопсуздугун камсыз кылуу, коомдук тартипти сактоо үчүн майрамдарда күчөтүлгөн тартипте иштейт. Эс алуу күндөрүбүз аз, тууган-туушкан, үй-бүлөө, карым-катнаш маселелери экинчи планга калат. Жумушка уйкусурап барган, ал тургай уйку келгенинен үйгө баргандан эригип, иш бөлмөдө столдун үстүнө уктаган күндөр болгон.
-Милиция коомдун күзгүсү дешет, тартип сакчыларынын азыркы коомдогу орду кандай, сиздин пикириңиз?
Эң биринчи эле тартип сакчыларын коргоо боюнча иш алып баруу керек деп ойлойм. Алар социалдык, материалдык, моралдык жактан колдоого муктаж. Азыр бир эле видео менен кызматкердин буга чейин иштеген эмгеги, мамлекетке өтөгөн кызматын жокко чыгарып, коомчулуктун пикири деп иштен алып коюп жатат. Мен муну туура эмес деп эсептейм.
Азамат Асымов
Кылдат текшерүү жүргүзүп анан чечим чыгарыш керек. Иштен алынган кызматкерлердин андан кийинки моралдык, психологиялык абалы, үй —бүлөөсү, туугандары жан башка факторлорду эске алуу зарыл.
Мен милицияны сындаган серепчилерге айта турган кебим бар, биздин кызматта 20 жыл эмес, 20 күн иштеп көрүп, анан сындашса.
Негизинен милиция кандай оор кырдаал болбосун эч качан өзүнүн кызыкчылыгын, мамлекеттин кызыкчылыгынан өйдө койгон эмес деп ойлойм. Милиция элди кордойт деген туура эмес, айлык маяналары аз экендигине карабай, күнү-түнү эл үчүн эле иштеп жүрүшөт. Ар бир тармакта кемчиликтер болбой койбойт, аны моюнга алыш керек. Кээ бир терс көрүнүштөргө жол берген кызматкерлер бар. Бирок, өлкөдөгү 17 миңден ашык тартип сакчысы бар, алардын баары бирдей деп айтыш мүмкүн эмес.
Канча деген кызматкер кылмыштуулук менен күрөшүүдө каза болот, ал жөнүндө ЖМК көп чагылдырбайт. Эрдик жасап, адам өмүрүн сактап калган кызматкерлер көп, алар жөнүндө азыраак кеп болуп эле, бир кызматкер тартип бузуп койсо ошону тынбай жамандап калышат.
