Жогорку Кеңештин депутаты Гүлкан Молдобекованын("Альянс" фракциясы) жардамчысы үй камагына чыгарылды. Бул тууралуу 24.kg басылмасына борбордун Биринчи Май райондук сотунан билдиришти.
Эске сала кетсек, 2024-жылдын 12-сентябрында УКМКнын кызматкерлери Жогорку Кеңештин депутатынын жардамчысын кармап, иш бөлмөсүнө тинтүү жүргүзүшкөн. Окуя болгон учурда парламентарий өлкөдөн тышкары болгон. Мамлекеттик комитет депутаттын жардамчысы «алдамчылык жана расмий документтерди жасалмалоо» деген негизде кармалганын билдирди. Тергөөнүн версиясы боюнча, ал 2021-жылы парламентке жумушка орношуп жатканда жасалма документтерди жана өзү тууралуу жалган маалыматтарды көрсөткөн. Мыйзамсыз жумушка орношуп, ал киши айлык жана бонустарды алган.
Соттун өткөн жылдын 30-декабрындагы аныктамасы менен Р.А.Рга карата камакка алуу түрүндөгү баш коргоо чарасы үй камагына алмаштырылган. Соттук отурумда депутаттын жардамчысы анча оор эмес кылмыштарды жасаган деп айыпталып жатканы, анын өздүгү такталып, туруктуу жашаган жери бар экени айтылды.
Кийинки соттук отурум 2025-жылдын 21-январына белгиленди.
