Улуттук коопсуздук боюнча мамлекеттик комитети ири уюлдук телефон контрабандалык схемасынын бетин ачты. Бул тууралуу Улуттук коопсуздук боюнча мамлекеттик комитеттин басма сөз борбору билдирди.
Маалыматка ылайык, айрым товар ташуучулар чек арачылар жана башка мамлекеттик кызматкерлер менен байланыш түзүп, белгилүү бренддердин кымбат баалуу смартфондорун мыйзамсыз алып келишкен. Ошентип, алар бажы төлөмдөрүн төлөөдөн качып, аппараттарды бизнеске тиешеси жок адамдарга Кыргызстандын жарандарына да, чет элдиктерге да каттатып коюшкан.
Телефондору катталган адамдардын паспорттук маалыматтары аларга чек арачылар тарабынан берилген. Мыйзамсыз иштердин натыйжасында мамлекеттик бюджет 100 миллион сомдон ашык чыгымга учураган.
Басма сөз борбору бул ишти иликтөөнүн алкагында 2024-жылдын 3-декабрында Бишкек жана Ош шаарларындагы соода борборлорунда жана дүкөндөрүндө тинтүү жүргүзүлүп, каттоодон өтпөгөн мобилдик аппараттар алынганын билдирди.
