Жогорку Кеңеш эки мыйзам долбоорун жабык эшик артында карайт. Мындай сунушту вице-спикер Нурбек Сыдыгалиев билдирди.
Биринчи мыйзам долбоору «Жогорку Кеңештин статусу жөнүндө» мыйзамга өзгөртүүлөрдү киргизүү. Бул мыйзам долбоору менен парламентарийлер кызматтык унааларын кайтарып берүүнү караган жатышат.
«Парламенттин депутаттары бул ыйгарым укуктарды натыйжалуу ишке ашырышы керек. Андан сырткары эл, бийлик бутактары менен тыгыз иштешет. Жогорку Кеңештин депутаттары иш-чараларга катышууга, ошондой эле шайлоочулар көтөргөн аймактардагы көйгөйлөр менен таанышууга милдеттүү. Буга байланыштуу кызматтык унааларга муктаждык жаралып, бул мыйзам долбоору аны берүү тартибин жөнгө салуу максатында иштелип чыккан», — деп айтылат мыйзам долбоорунун негиздеме документинде.
Белгилей кетсек, бир күн мурун президент Садыр Жапаров депутаттарга кызматтык унааларын кайтарып берүүдөн баш тарткан.
Экинчи мыйзам долбоору — Жогорку Кеңештин «Мыйзам чыгаруу үчүн кошкон салымы үчүн» медалын белгилөө. Мыйзам долбооруна негиздеме күбөлүгү жана башка документтер Жогорку Кеңештин сайтында жарыяланган эмес.
