2024-жылдын акырына карата инфляция 6 пайызды түзөрү күтүлүүдө. Бул Улуттук банктын 5-7 пайыз чегинде белгиленген орто мөөнөттүү максаттарына туура келет. Бул тууралуу Улуттук банктын жетекчисинин орун басары Азат Козубеков Бишкекте өткөн маалымат жыйынында билдирди.
«Биздин божомолдор боюнча, жылдын аягына чейин инфляция болжол менен 6 пайызды түзөт, бул биздин максаттуу көрсөткүчтөрүбүзгө туура келет. Биз чарба жүргүзүүчү субъекттердин инфляциялык күтүүлөрү жана инфляциянын негизги бөлүгү акырындык менен төмөндөп жатканын көрүп турабыз», — деп белгиледи ал.
Азат Козубеков ошондой эле эсептик ченди 9 пайыз деңгээлинде кармоо өлкөдөгү баанын туруктуулугун сактоого багытталганын баса белгиледи.
Октябрда инфляция жылдык мааниде 4,6 пайызды түзсө, 2024-жылдын декабрынын акырына карата көрсөткүч 2023-жылдын ушул мезгилине салыштырмалуу 6 пайызды түзөрү болжолдонууда.
Азат Козубеков ошондой эле өлкөнүн алтын-валюта резерви 4,8 миллиард долларды түзөрүн билдирди. Алардын түзүмүнө чет өлкөлүк валюта, депозиттер, баалуу кагаздар жана киреше алып келүүчү башка активдер кирет. Бул активдердин наркынын өзгөрүшү резервдердин өсүшүнө да таасирин тийгизет. Бул болсо улуттук экономиканын туруктуулугун сактоого жардам берет.
Эске сала кетсек, Улуттук банк эсептик ченди 9 пайыз деңгээлинде калтырган. Банк тутумунун кредиттик портфели жана депозиттик базасы тиешелүүлүгүнө жараша 301 миллиард жана 555 миллиард сомду түздү. Ошондой эле, регулятордун эл аралык резервдери 2024-жылдын башынан бери 47 пайызга көбөйдү.
