Садыр Жапаров бир катар чет мамлекеттердин сот органдарынын жетекчилерин Ынтымак Ордодо кабыл алды. Бул тууралуу президенттик аппараттын басма сөз кызматы билдирди.
Мамлекет башчысы Түркиянын Жогорку кассациялык сотунун төрагалары Омер Керкез, Азербайжандын Жогорку сотунун төрагасы Инам Каримов, ж.б. О. Молдованын Жогорку Сотунун Төрагасы Стела Прокопчук, Кытайдын, Беларустун, Казакстандын, Тажикстандын, Өзбекстандын жана Армениянын сот системаларынын өкүлдөрүн кабыл алды.
Президент сот органдарынын жетекчилери менен салам алышууда Кыргызстандын сот тутумунун 100 жылдык мааракеси — мамлекеттин өнүгүү жолундагы тарыхый окуя экенин айтты. Буга байланыштуу ал бул тарыхый окуяга жогорку даражалуу коноктордун катышкандыгы үчүн ыраазычылык билдирди.
Садыр Жапаров ар бир мамлекеттин өнүгүшүндө сот системасынын ролу жогору экенин белгилеп, Кыргызстандын сот тутуму, анын ичинде судьялар менен сот системасынын кызматкерлери укуктук мамлекеттин калыптанышына баа жеткис салым кошуп, жарандардын мыйзамдуу укуктары менен эркиндигин ишенимдүү коргоп келатканын айта кетти.
Мамлекет башчысы Кыргызстан башка мамлекеттер менен көп тараптуу интеграциялык процесстерди толугу менен колдой турганын кошумчалады. Буга байланыштуу ал боордош өлкө жана стратегиялык өнөктөш санаган мамлекеттер менен достук мамиле жана өз ара пайдалуу кызматташуу үчүн укуктук, маданий, гуманитардык жана илимий тажрыйба алмашуу чөйрөсүндө болгон күч-аракет жумшалып жатканын айтып өттү.
