06:15
USD 89.43
EUR 97.22
RUB 0.97

Министрлер кабинети Бишкектин мэрин түз шайлоого каршы чыкты

Министрлер кабинети Бишкек шаарынын мэрин түз шайлоо жөнүндөгү мыйзам долбооруна терс корутунду берди. Бул тууралуу 14-марттагы жыйында депутат Жанарбек Акаев билдирди.

«Жергиликтүү мамлекеттик администрация жана жергиликтүү өз алдынча башкаруу органдары жөнүндө» жана «Борбордун макамы жөнүндө» мыйзамдарга өзгөртүү киргизүү тууралуу документти парламенттеги «Альянс» фракциясынын депутаттары иштеп чыккан.

Акаевдин айтымында, министрлер кабинети өзүнүн терс кортунусунда түз шайлоо туруксуздукка алып келиши мүмкүн экенин билдирген.

«2020-жылдын октябрь окуясынан бери Бишкекте сегиз мэр алмашты. Түз шайлоо стабилдүүлүккө алып келет деп эсептейм, анткени мэрди шаардыктар өздөрү тандайт. Мэр өзүнүн программасы бар, такшалган адам болушу керек», — деди Акаев.

Депутат мыйзам кабыл алынса, шайлоо Бишкек шаардык кеңешинин депутаттарынын ыйгарым укуктары аяктагандан кийин болорун жана шаар башчысы депутаттар менен чогуу шайланарын кошумчалады.

Жогорку Кеңештин Конституциялык мыйзамдар, мамлекеттик түзүлүш, сот-укук маселелер боюнча комитети талкуудан кийин мыйзам долбоорун биринчи окууда колдоду.

Мурда шаар мэрлерин жергиликтүү кеңештин депутаттары шайлачу. 2021-жылы мыйзам өзгөртүлүп, республикалык жана облустук маанидеги шаарлардын мэрлерин президент, райондук маанидеги шаарчалардын башчысын аким дайындап калган.

Эң көп окулган жаңылыктар
23-февраль, жума
22-февраль, бейшемби