Коргоо министрлиги диний көз-караштары жол бербеген жарандарга альтернативдүү кызмат өтөөнү сунуштоодо. Бул тууралуу Жогорку Кеңештин эл аралык маселелер, коргоо, коопсуздук жана миграция боюнча комитетинин жыйында коргоо министринин орун басары Алмазбек Карасартов билдирди.
Анын айтымында, айрым медреселердин бүтүрүүчүлөрү курал кармагандан баш тартат.
Депутат Нуржигит Кадырбеков, диндин мамлекеттик иштерге кийлигишүүсүнө тыюу салынгандыгын белгиледи.
«Исламда андай жок. Мекенди коргоо ыйык милдет болуп саналат. Ошондуктан биз каза болгондорду шейит кетти дейбиз. Медресе менен байланыштырбаңыз. Эгер ошондой медресе болсо, маалымат бериңиз текшерип көрөлү. Алар адашып жүргөндөр окшойт. Финансалык каражаттары жана юристтери күчтүү секталар бар, аларда армияга кызмат өтөөгө тыюу салышат», — деди ал.
