Лейлек районунда ок атуучу курал сактап жүргөндөр кармалды. Бул тууралуу Баткен ОИИБнын басма сөз кызматы билдирди.
Маалыматка караганда, Кайрагач айылындагы чек ара постунда “Мерседец-Бенц” автоунаасы токтотулуп, анын ичинен райондун 44 жаштагы Ш.Д. аттуу тургуну, Жалал-Абад облусунун 27 жаштагы О.А. жана Ыссык-Көл облусунун 26 жаштагы И.Ж. аттуу тургуну курал-жарак менен кармалды.
Алардан 1 даана “ПМ” (травматикалык) үлгүсүндөгү тапанча жана 16 калибрдеги (обрез) курал таап алынды. Алынган куралдарга экспертиза дайындалып, экспертизанын жыйынтыгында ок атуучу курал атайын кесилип, ок атууга даярдалгандыгы аныкталды.
Бул факты боюнча сотко чейинки өндүрүш иши башталды.
