Сооронбай Жээнбеков 26-июлда Тажикстанга барат. Бул тууралуу өлкө башчысынын тышкы саясат бөлүмүнүн жетекчиси Данияр Сыдыков билдирди.
Анын айтымында, Эмомали Рахмон менен мурда белгиленгендей жолугушуу Исфарада өтөт. Президенттер сүйлөшүүсүнүн экинчи бөлүгүн Чолпон-Ата шаарында улантышат.
Эскерте кетсек, 22-июлда кечке жуук Баткен облусунун Баткен районунун Тажикстандын Ворух эксклавы менен кесилишкен аймагында чатак чыгып, ок атышуу болгон. Анда бир киши набыт болгону айтылууда.
Баткендин Ак-Сай районунун тургундары Ворух айылынын жашоочуларынын айыл четине байрак илүүсүнө каршы чыгышкан. Кагылышууда Кыргызстан тараптан 14 киши жаракат алды. Алардын бешөө жергиликтүү тургундар.
