Эмгек сиңирген юрист, мамлекеттик ишмер Асанбек Шаршеналиев дүйнө салды

Көрүнүктүү мамлекеттик ишмер, юридика илимдеринин доктору, Кыргыз Республикасынын эмгек сиңирген юристи Асанбек Шаршеналиев 85 жашында дүйнөдөн кайтты.

Асанбек Шаршеналиевич Нарын облусунун Жумгал районунун Кызыл-Туу айылында туулган. Анын өлкөнүн укук системасынын калыптанышына жана өнүгүшүнө кошкон салымын баалабай коюуга мүмкүн эмес. Өмүрүн мыйзамдуулукка жана акыйкаттыкка кызмат кылууга арнап, эң маанилүү мамлекеттик кызматтарды аркалаган: Конституциялык соттун төрагасы, Кыргыз Республикасынын Башкы прокурору, Кыргыз мамлекеттик улуттук университетинин Юридикалык институтунун директору болуп эмгектенген.

Анын эмгек таржымалы берилгендиктин, кесипкөйлүктүн жана жоопкерчиликтин үлгүсү болуп саналат. Анын аракети менен Кыргызстанда укуктук көзөмөл жана коррупцияга каршы күрөшүү системасы чыңдалды. Юристтердин көптөгөн муундары аны насаатчы жана өлкөнүн юридикалык илимине жана практикасына эбегейсиз салым кошкон инсан катары эстешет.

Асанбек Шаршеналиевичтин жаркын элеси анын үй-бүлөсүнүн, жакындарынын жана аны тааныган, урматтаган ар бир адамдын жүрөгүндө түбөлүккө сакталат.

24.kg редакциясы маркумдун үй-бүлөсүнө жана жакындарына терең кайгыруу менен көңүл айтат.

Асанбек Шаршеналиевди акыркы сапарга узатуу зыйнаты 13-декабрда төмөнкү даректе болот:

Бишкек шаары, Бакаева көчөсү, 89/3.