Бүгүн, 25-ноябрда, Вена шаарында президент Садыр Жапаровдун Австрия Федералдык президенти Александер Ван дер Беллен менен расмий жолугушуу аземи болуп өттү. Бул тууралуу мамлекет башчысынын басма сөз кызматы билдирди.
Маалыматка ылайык, эки өлкөнүн лидерлери «Хофбург» президенттик сарайында жолугушкан.
Президент Садыр Жапаровдун келишинин урматына Кыргызстандын мамлекеттик желеги салтанаттуу түрдө көтөрүлүп, Ардак кароолдун ротасынын командири саламдашуу рапортун берди, эки өлкөнүн мамлекеттик гимндери жаңырды. Андан соң мамлекет башчылары Ардак кароолдун катарынын алдынан басып өтүштү, «Хофбург» президенттик сарайынын фонунда чогуу сүрөткө түшүү аземинен кийин сарайда расмий делегациялардын мүчөлөрү менен тааныштыруу болуп өттү.
Расмий жолугушуу аземи аяктагандан кийин Садыр Жапаров менен Александер ван Дер Беллен сүйлөшүүлөргө өтүштү.
