Жогорку Кеңештин жыйынында депутаттар жалаа, мазактоо жана жалпыга маалымдоо каражаттарында жана социалдык тармактарда жалган маалымат таратуу үчүн 100 миң сом айып салуу боюнча Маданият министрлигинен мыйзам долбоорун биринчи окууда талкуулап жатышат.
Эл депутаты Кубанычбек Самаков айрым мыйзам бузуулар үчүн жоопкерчиликти Маданият министрлиги эмес, укук коргоо органдары алышы керектигин белгиледи.
«Ички иштер министрлиги, прокуратура бар. Маданият министрлигине кошумча 10 штаттык бирдик ачып, жабдыктарды сатып алып, тартип бузгандар менен иш алып барабыз дештин эмне кереги бар? Анда Ички иштер министрлигин жаап салалы! Анда бул министрлик эмне кылат? — деп сурады Кубанычбек Самаков.
Юстиция министринин орун басары Орозбек Сыдыков Маданият министрлиги бул маселелерди жөнгө салбаса, эл бири-бирин «балталап таштайт» деп эсептейт.
«Бул жерде ИИМдин өкүлдөрү балталап кетпесин деп отурушат. Ушундан улам укук коргоо органдары бар. Маданият министрлиги ушул маселелерди көзөмөлгө алса, анда эл бири-бирине балталабайт?» — деди Кубанычбек Самаков.
Юстиция министринин орун басары жалаа жаап, жалган маалымат тараткан жарандарды жоопкерчиликке тартуу үчүн тергөөчүнүн кереги жок деп жооп берди. Чиновник өзү айып пул салышы мүмкүн.
«Бирок мыйзамдуулук жана укук тартиби комитетинин корутундусунда арыздарды жана мындай фактыларды укук коргоо органдары карап, андан кийин иш сотко өткөрүлөт деп жазылган. Мындай сунуш болгон. Балким, бул норма экинчи окууда колдоо табат», — дейт Орозбек Сыдыков.
Депутат бул сунушту колдой турганын кошумчалады.
Эске сала кетсек, алар Мыйзам бузуулар жөнүндө кодексти маалымат каражаттарында жана интернетте жалаа жабуу жана кемсинтүү боюнча берене менен толуктоону каалап жатышат. Кошумчаларга ылайык, жалган жалаа, кемсинтүүлөр үчүн жеке жактарга 100 миң сом, юридикалык жактарга 200 миң сом айып салынат.
Президент Садыр Жапаров мазактоо үчүн айып пул салуу керек деп эсептейт.
