Журналист Арзыгүл Галымбетованын өлүмү боюнча экспертизанын бүтүмү чыкты. Бул тууралуу 24.kg агенттигине блогер Батма Жолболдуеванын жактоочу Назгүл Сүйүнбаева билдирди.
Анын айтымында, судмедэкспертизанын жыйынтыгы боюнча журналист астмадан улам жүрөгү кармап каза тапты.
«Бул деген айыпталуучу Батма Жолболдуеванын анын өлүмүнө тиешеси жоктугун билдирет. Менин пикиримде, врач-ординатор туура эмес диагноз койгон. Даарыгерлер убакытты текке кетиришкен. Эгер ага жүрөгүн эске алып, жардам көрсөткөндө куткара алмак», — дейт Назгүл Сүйүнбаева.
Эскерте кетсек, Арзыгүл Галымбетова 26-мартта каза тапты. Анын өлүмүнө айыпталып блогер Батма Жолболдубаева камакка алынды.
