Тышкы иштер министрлиги орус-казак чек арасынан өтө албай турган кыргызстандыктары эртең мекенине алып келет. Бул тууралуу мекемеден билдиришти.
Маалыматка караганда, азыр дипломаттар Башкырстанда калган кыргыздарды Соль-Илецк шаарына ташып келүүдө.
Чек арадан өткөндөн кийин алар автобус менен Казакстан аркылуу Кыргызстанга жеткирилет. Өтө көп адам топтолгондуктан биринчи топ 24-сентябрда, экинчиси 25-сентябрда алып келинет.
ТИМ мигранттарга орус-казак чек арасы жабык экенин жана шылуундарга ишенип жолго чыкпоону өтүнөт.
Белгилей кетсек, орус-казак чек арасында 3 миң 200 кыргыз жараны топтолду. Буга чейин дагы бир нече жолу Тышкы иштер министрлиги Казакстан менен сүйлөшүп, чек арага топтолгон жарандарды өлкөгө алып келген.
