Вице-премьер-министр Аида Исмаилова ыктыярчылар кыймылынын өкүлдөрү менен жолугушуу өткөрдү. Бул тууралуу өкмөттүн басма сөз кызматы билдирди.
Анын айтымында, ыктыярчылар мамлекет тарабынан колдоого муктаж болгон өлкөдөгү негизги көйгөйлөр тууралуу айтып беришкен.
Тактап айтканда, региондордогу ыктыярдуу кыймылдын ишин координациялоо, колл-борборду техникалык жактан колдоо, рентгендик диагностика кызматтарынын жеткиликтүүлүгү, алыскы аймактарды керектүү дары-дармектер менен камсыз кылуу, калкты эпидемияга каршы иш-чаралардын аткарылышы жөнүндө маалымат берүүнү улантуу туурасында болгон.
«Коронавирус илдетине каршы күрөшүүдө өкмөт менен ыктыярдуу уюмдардын мындан ары чогуу иш алып баруу жөнүндө чечими кабыл алынды», — деп билдирет өкмөттүн басма сөз кызматы.
Эске салсак, буга чейин президент Сооронбай Жээнбеков коронавирустук инфекциянын жайылышына каршы күрөшүүдө ар тараптуу жардам көрсөткөн ыктыярчылар жана жарандык активисттер менен жолугушуу өткөргөн.
