Ак илбирс VI Дүйнөлүк көчмөндөр оюндарынын тумары болуп тандалды. Бул тууралуу Дүйнөлүк көчмөндөр оюндарынын катчылыгынан билдиришти.
Маалыматка ылайык, Көчмөндөр оюндарынын расмий тумары катары ак илбирс эми оюндардын визуалдык жана коммуникациялык идентификациясынын ажырагыс бөлүгүнө айланат.
Тумарды тандоо 2026-жылдагы Дүйнөлүк көчмөндөр оюндарына даярдык көрүүнүн алкагында сунушталды. Оюндар Кыргызстанда өтүп, ар кайсы өлкөлөрдөн келген катышуучуларды спорттук, маданий жана илимий программалар аркылуу бириктирет.
Катчылыктан белгилешкендей, ак илбирс кокусунан тандалган жок. Бул образ Кыргызстандын жаратылышы, анын ландшафты, мүнөзү жана маданий коду менен тыгыз байланышта. Оюндардын алкагында ал күчтү, кадыр-баркты, урматтоону жана ички тең салмактуулукту символдоштурат. Бул сапаттар спортко да, көчмөн маданиятынын философиясына да мүнөздүү.
«Ак илбирс — бул күч менен урмат айкалышкан, салттары дүйнөгө ачык Кыргызстанды чагылдырган образ. Бул тумар аркылуу биз Дүйнөлүк көчмөндөр оюндарынын духун, кадыр-барк, тең салмактуулук жана өз ара аракеттенүүгө ачыктыгын жеткирүүнү кааладык», — деп белгилешти Дүйнөлүк көчмөндөр оюндарынын катчылыгынан.
Тумардын визуалдык образы Кыргызстандын жаратылышын, көчмөн мурастарын жана долбоордун заманбап үндөлүшүн бириктирет.
Ак илбирс — бул жөн гана тумар эмес, ал кабыл алуучу өлкөнүн мүнөзүн жана Дүйнөлүк көчмөндөр оюндарынын баалуулуктарын чагылдырган образ.
