15:42, 23 августа 2017, Бишкек - 24.kg , Жазгүл МАСАЛИЕВА
Жогорку Кеңештин мурдакы депутаты Райкан Төлөгөновго операция жасоого уруксат бериле элек. Бул тууралуу бүгүн ал Биринчи май райондук сотунда журналисттерге билдирди.
Анын айтымында, жалпыга маалымдоо каражаттарына аялынын кайрылуусу жарыялангандан кийин кардиолог келип, текшерген.
«Ал дагы операция керектигин айтты. Бирок, качан операцияга уруксат берет белгисиз. Маселе каралып жатат. Азыр дарынын күчү менен гана кармалып турам» — деди Райкан Төлөгөнов.
Райкан Төлөгөновго 2010-жылдын 7-апрелинде экс-президент Бакиевдин үй-мүлкүн тоногон айыбы менен иш козголуп, соттук териштирүү жүрүп жатат.
Күбөлөрдү алып келүү кыйын болуп жаткандыктан жана соттолуучунун ден-соолугуна байланыштуу сот 6-сентябрга жылдырылды.