Мектепке чейинки билим берүүнүн өкмөттүк акселераторлорун кеңейтүү Баткен облусунан башталды. Бул тууралуу президенттин басма сөз кызматы билдирди.
Маалыматка ылайык, балдар укуктары боюнча ыйгарым укуктуу өкүл Асел Чынбаева 2026-жылга чейин өнүктүрүүнүн улуттук программасын ишке ашырууну тездетүү максатында Баткен облусунда кеңешме өткөрдү.
Бишкек шаарында мектепке чейинки билим берүүнүн өкмөттүк акселераторун ишке ашыруу тажрыйбасы жана 2019-2030-жылдарга калктын саламаттыгын сактоо жана саламаттыкты сактоо системасын өнүктүрүү боюнча министрлер кабинетинин программасын ишке ашыруудан алынган сабактар талкууланды.
Маалыматта белгиленгендей, өкмөттүк акселераторлорду кеңейтүү программасы Баткен облусунда башталды. Эми бардык ийгиликтүү реформалар Баткенден башталат.
Бүгүнкү күндө саламаттыкты сактоо тармагында да, билим берүү тармагында да комплекстүү системалык реформалар жүрүп жатат. Биргелешкен иштердин натыйжасында Баткен облусунун алыскы жана чек арага жакын аймактарында социалдык өнүгүү кластери түзүлдү.
Белгилей кетсек, 2023-жылдын март айында министрлер кабинети тарабынан «Мектепке чейинки билим берүү менен камтууну жогорулатуу боюнча мамлекеттик акселератор» ишке киргизилген. Бул БАЭнин өкмөтү тарабынан иштелип чыккан реформаларды жүргүзүүнүн атайын механизми жана ага ылайык мамлекеттик органдар 100 күндүк мөөнөттө көйгөйлөрдү чечип, коюлган максаттарга жетиши керек.
