16:13, 02 марта 2020, Бишкек - 24.kg
Бийлик өкүлдөрү Садыр Жапаровдун туугандары менен үч күндөн кийин жолукмай болду. Бул тууралуу бүгүн «Ала-Тоо» аянтындагы митингде Садыр Жапаровдун агасы Сабыр билдирди.
Ал президенттин өкүлү менен жолугуп чыкканын айтты.
«Жапаровдордун сөөгү ыраазы. Ушунчалык ыраазыбыз. Биз азыр 9 адам барып, президенттин өкүлдөрү менен жолугуп чыктык. 3 күндүн ичинде бизди кайра кабыл алышып, жооп айтабыз дешти. Үч күн күтөлү. Үч эле күн», — деди ал.
Белгилей кетсек, бүгүн борбордук аянтта Жогорку Кеңештин мурдакы депутаты Садыр Жапаровду колдоо митинги өттү.
Садыр Жапаров 2013-жылы «Караколдо митинг уюштуруп, Ысык-Көлдүн ошол кездеги губернатору Эмилбек Каптагаевди барымтага алган» деген айыптын негизинде 2017-жылдын мартында камакка алынган. 2018-жылы июнь айында экс-депутат 11 жыл алты айга кесилген.
Быйыл апрелде Жогорку сот анын жаза мөөнөтүн 1,5 жылга кыскартып, он жылын калтырган.