11:01, 29 января 2018, Бишкек - 24.kg
УКМК «Бишкек жылуулук станциясындагы» кырсык боюнча текшерүү жүргүзүүдө. Бул тууралуу «24.kg» агенттигине мекеменин маалымат кызматынан билдиришти.
Алардын маалыматында, мекеме кырсык болгон күндөн тарта эле станцияны террордук каршы операциянын алкагында текшерип баштаган. УКМК жыйынтыгын жарыялоону убадалайт.
Эскерте кетсек, 26-январь күнү «Бишкек жылуулук станциясында» кырсык болуп, шаарга жылуулук берүү кескин азайды. Бишкектиктер батирлердин ичи жылыбай жатканын айтышууда.
Өкмөт үйүндө тоңгондорду мейманканаларга жайгаштырып, шаарда бир нече жылынуучу жайларды уюштурду.
Акыркы маалыматтар боюнча, станция дагы эле толугу менен ишке кире элек.