Кыргызстанда беш жыл ичинде өзгөчө кырдаалдан 1 миң 764 адам каза тапкан

2021-жылдан 2025-жылга чейин Кыргызстанда 283 өзгөчө кырдаал катталып, анын кесепетинен 1 миң 764 адам каза болгон. Мындай маалыматтар өзгөчө кырдаал кесепеттерин жоюунун жана авариялык-куткаруу иштерин жүргүзүүнүн жаңы эрежелери тууралуу президенттин жарлыгынын долбооруна карата маалымкат-негиздемеде келтирилген.

Бул мезгилде өзгөчө кырдаалдардан келтирилген жалпы материалдык зыян 8 миллиард 234 миллион 709 миң 400 сомду түздү.

Документте табигый кырсыктар боюнча маалыматтар өзүнчө берилген. 2024-жылы селден 22 адам каза болсо, 2026-жылдын башынан бери дагы сегиз адам каза тапкан. 2023—2024-жылдары кар көчкүнүн курмандыктары 16 адам болду.

Сууда каза болгондордун көрсөткүчү да жогору бойдон калууда. 2023-жылы сууга чөгүп 103 адам, 2024-жылы — 86, 2025-жылы — 81 адам каза болгон. 2026-жылдын биринчи алты айында дагы 48 адам сууга чөгүп каза болгону катталды.

Кыргызстанда өзгөчө кырдаалдардын кесепеттерин жоюунун жана авариялык-куткаруу иштерин жүргүзүүнүн жаңы эрежелерин бекитүү сунушталган президенттин жарлыгынын долбоору коомдук талкууга коюлду.