15:12, 19 июня 2026, Бишкек - 24.kg
2024-жылдан бери Кыргызстанда жигердүү туристтик жана гастрономиялык объекттердин саны кыйла көбөйдү. Өзгөрүүлөрдүн динамикасын 2ГИС картографиялык сервиси сунуштады.
Маалыматка ылайык, 2024-жылдын июнь айынан 2026-жылдын июнь айына чейинки өзгөрүүлөр меймандостук жана коомдук тамактануу чөйрөсүнүн сегиз негизги багыты боюнча изилденген: «Коттеждерди — конок үйлөрүн ижарага берүү», «Эс алуу базалары», «Тез татым», «Мейманканалар», «Кафелер», «Ресторандар», «Суши-барлар» жана «Хостелдер».
«Изилдөө өлкөнүн туристтик инфраструктурасынын туруктуу өсүшүн көрсөттү. Өзгөчө эс алуу базалары, мейманканалар жигердүү өнүгүп жатат, ал эми коомдук тамактануу чөйрөсүндө тез татым сегменти баарынан тез өсүүдө», — деп белгилешти авторлор.
Өсүү динамикасы боюнча «Эс алуу базалары» рубрикасы лидер болгону айтылат. Алардын картадагы саны 63,8 пайызга өсүп, 2024-жылдагы 260тан 2026-жылы 426 объектке жеткен.
Ошондой эле мейманканалар да олуттуу өсүштү көрсөтүүдө — алардын саны 46,2 пайызга (628ден 918ге чейин) өстү. Ал эми коттеждер — конок үйлөрүн ижарага берүү сектору 39,8 пайызга көбөйдү.
Коомдук тамактануу жайларынын арасында эң байкалаарлык өсүштү тез татым сегменти көрсөтүүдө: мындай объекттердин саны 2ГИС картасында эки жылдын ичинде 38,3 пайызга — 1 миң 675тен 2 миң 317ге чейин көбөйгөн.