08:13, 12 июня 2026, Бишкек - 24.kg
Балет, Шакира жана Бочелли. 2026-жылдагы дүйнө чемпионаты Мехикодогу «Ацтека» стадионунда көркөмдүү ачылыш аземи менен өттү.
Биринчи бөлүгү Мексика жана ТАР курама командаларынын ортосундагы беттештин башталышына болжол менен 1,5 саат калганда башталды. Майданга алтын түстүү оймо-чиймелери бар жашыл кездеме төшөлдү. Мексикалык ырчы жана композитор Лила Даунс жергиликтүү ак түстөгү кийим менен чыкты. Аны шамандардын жана кичинекей алтын футбол топторунун образындагы актёрлор менен бийчилер коштоп жүрүштү.
Бул ырым-жырымдын натыйжасында талаанын борборунда Дүйнөлүк кубоктун чоң трофейи көтөрүлүп чыкты.
Колумбиялык ырчы Шакиранын чыгышы адаттагыдай эле салтка айланды. Ал төрт дүйнө чемпионатында өнөр көрсөткөн биринчи артист болуп калды, буга чейин 2006, 2010 жана 2014-жылдардагы мундиалдарда композицияларды аткарган.
Шакира Мехикодо нигериялык музыкант Burna Boy менен бирге дүйнө чемпионатынын «Dai Dai» аттуу расмий эмес гимнин аткарды. Стадиондо салют атылды.
Сахнага латын америкалык жылдыздар, алардын ичинде Алехандро Фернандес, Belinda, J Balvin, Danny Ocean, Лила Даунс, «Maná» тобу, «Los Ángeles Azules» жана түштүк африкалык ырчы Tyla чыгышты.
Сальма Хайек жана Андреа Бочелли
Ачылыш аземинин корутунду бөлүгүн мексикалык-америкалык актриса Сальма Хайек баштады. Ал дүйнө чемпионатынын тандоо туруна катышкан жана мелдештин финалдык бөлүгүнө жолдомо алган бардык командаларга салам жолдоду. «Жашасын футбол жана Мексика!» — деп жыйынтыктады актриса.
Андан кийин дүйнө чемпионатынын катышуучуларынын желектеринин парады башталды. Диктор өлкөлөрдү бир-бирден жарыялап, бардык катышуучулар борбордук тегеректин айланасына чогулушту.
Салтанат Эл аралык футбол федерациясынын (ФИФА) президенти Джанни Инфантинонун чыгышы менен аяктады. Ал Дүйнөлүк кубоктун трофейин атайын орунга койду. Будан кийин чакан фейерверк болду. Андан соң беттеш алдындагы расмий азем өттү.