Араван районунда коррупцияга шектелген мурдагы аткаминерлер кармалды

11:29, 10 декабря 2025, Бишкек - 24.kg

Ош облусунун Араван районунда жер тилкелерин мыйзамсыз трансформациялоого байланыштуу беш мурдагы мамлекеттик кызматкер кармалышты. Бул тууралуу Ош шаардык Ички иштер башкармалыгынын басма сөз кызматы билдирди.

Маалыматка ылайык, алар Кең-Сай массивиндеги жер тилкелерин трансформациялоодо жемкорлукка барышкан деп шектелип, Кылмыш-жаза кодексинин 336-беренесинин (Коррупция) негизинде убактылуу кармоочу жайга киргизилген.

Айыпталып жаткандар:

• Араван райондук шаар куруу жана архитектура башкармалыгынын мурдагы башчысы. Ал 58 жашта.
• Араван районунун Нурабад айыл өкмөтүнүн 72 жаштагы мурдагы башчысы.
• Араван райондук жер ресурстары геодезия жана картография боюнча кадастр мамлекеттик мекемесинин мурдагы жер адиси. Ал 56 жашта.
• Нурабад айыл өкмөтүнүн 57 жаштагы мурдагы жер адиси.
• Араван райондук шаар куруу жана архитектура боюнча башкармалыгынын мурдагы адиси. Ал 40 жашта.

Учурда аталган кылмышка тиешеси бар башка адамдарды аныктоо үчүн тергөө иштери уланууда.