12:59, 13 февраля 2025, Бишкек - 24.kg
Мамлекеттик финансы рыногун жөнгө салуу жана көзөмөлдөө кызматынын мурдагы жетекчиси Юруслан Тойчубеков 5-апрелге чейин камакта калтырылды. Бул тууралуу 24.kg агентигине Бишкектин Биринчи май сотунан билдиришти.
Маалыматка ылайык, Юруслан Тойчубековго Кылмыш-жаза кодексинин «Финансы пирамидаларын уюштуруу» беренеси менен айып тагылды.
Эске сала кетсек, февраль айынын башында УКМК MCN Coin виртуалдык активинин негиздөөчүлөрүнүн бири Исрадин Субанбековду кармаган. Кийинчерээк ал алдамчылыкты мойнуна алган видео жарыяланган. Анын айтымында, бир жарым жыл ичинде ишкана жарандардан 2,5 миллион доллар чогулткан.
Исрадин Субанбеков өзү, Рыскул Болотбеков жана Мухтар Бегмат уулу «криптовалютаны» жаратканын айткан. Аларды бул маселеде Мамлекеттик каржы көзөмөл кызматынын мурдагы жетекчиси Юруслан Тойчубеков жетекчиликке алган.
Буга чейин Финансы рыногун жөнгө салуу жана көзөмөлдөө кызматы мамлекеттик каттоодон өтпөгөн жана тиешелүү реестрлерге кирбеген MCN Coin виртуалдык активине инвестиция салууга каршы эскерткен.