17:23, 27 декабря 2024, Бишкек - 24.kg
Бүгүн, 27-декабрда Бишкек шаарынын Кызыл-Аскер аймагында жайгашкан № 12 жаңы үй-бүлөлүк медицина борборунун салтанаттуу ачылышы болду. Бул тууралуу Саламаттык сактоо министрлигинен билдиришти.
Ачылыш аземге саламаттыкты сактоо министри Алымкадыр Бейшеналиев катышты. Жаңы борбор бул аймактардын тургундарын сапаттуу медициналык тейлөө менен камсыз кылуу максатында түзүлдү.
Жалпы баасы 70 миллион сомдон ашык имараттын курулушу 2022-жылдын июль айында башталып, анда ҮМБнын № 1 филиалын жайгаштыруу пландалган.Бирок, административдик-аймактык реформанын алкагында Чүй облусунун айрым райондору борборго кошулуп, өз алдынча мекеме — № 12 үй-бүлөлүк дарыгерлер борборун түзүү чечими кабыл алынган.
Саламаттыкты сактоо министри Алымкадыр Бейшеналиев өз сөзүндө No12 үй-бүлөлүк дарыгерлер борборунун ачылышы менен Бишкек шаарынын медициналык инфраструктурасы чыңдалып, шаар тургундарына сапаттуу жана өз убагында кызмат көрсөтүү болорун белгиледи. Министр ошондой эле медицина кызматкерлерине эмгеги үчүн ыраазычылык билдирип, жаңы борбордун ишине ийгиликтерди каалады.