08:30, 26 декабря 2024, Бишкек - 24.kg
Кыргызстан Перс булуңунун алты өлкөсүнө: Сауд Арабиясы Падышалыгы, Бириккен Араб Эмираттары, Катардын, Кувейттин, Омандын жана Бахрейндин жарандары үчүн визасыз режимди киргизүүдө. Жаңы эрежелер 2025-жылдын 4-январынан тарта күчүнө кирет. Бул тууралуу Тышкы иштер министрлигинин басма сөз кызматы билдирди.
Белгиленген тартипте Кыргыз Республикасына туристтик максатта келген бул мамлекеттердин жарандары бир календардык жыл ичинде өлкөдө жалпысынан 180 күнгө чейин визасыз жүрө алышат.
Бирок, жумуш же окуу сыяктуу башка максаттар үчүн кирген учурда, сапардын максатына ылайык виза талап кылынат.
Бул чара туристтик агымды көбөйтүүгө жана Кыргызстандын инвестициялык жана бизнес жагымдуулугун жогорулатууга багытталган.
Толук маалымат алуу үчүн Тышкы иштер министрлигинин Консулдук башкармалыгына Бишкек шаары, Тоголок Молдо көчөсү, 10 дареги боюнча, ошондой эле +996703428865 жана +996999312002 (WhatsApp) номурлары боюнча кайрылсаңыз болот.