13:53, 25 декабря 2024, Бишкек - 24.kg
Министрлер кабинетинин төрагасы Адылбек Касымалиев Мамлекеттик салык кызматында кеңешме өткөрдү. Бул тууралуу министрлер кабинетинин басма сөз кызматы билдирди.
Жыйында салык чөйрөсүндөгү коррупцияга каршы күрөшүүнүн актуалдуу маселелери, электрондук товартранспорттук колдонмолорду(ЭТТК) киргизүүнүн жүрүшү, отчеттуулукка байланышкан көйгөйлөрдү четтетүү, электрондук системалардын иштеши жана башка ушул сыяктуу маселелер талкууланды.
Адылбек Касымалиев Мамлекеттик салык кызматынын алдына бир катар милдеттерди коюп, өзгөчө бюджетти түзүүчү товарларга толук мониторинг жүргүзүү жана 2024-2025-жылдарга пландын аткарылышын камсыз кылуу зарылдыгын белгиледи.
Министрлер кабинетинин башчысы ЭТТКны жоюуга жол берилбестигин айтып, бирок бул процессти жөнөкөйлөтүү боюнча иштер жүргүзүлөрүн жана ЭТТК талап кылынган товарлардын тизмесин кайра карап чыгуу мүмкүнчүлүгү изилденээрин кошумчалады.
Ал ошондой эле салык төлөөчүлөр үчүн жагымдуу шарттарды түзүүнүн жана Мамлекеттик салык кызматынын коррупцияга каршы күрөшүү жана салыктын ачыктыгын жогорулатуу боюнча натыйжалуу ишин камсыз кылуунун маанилүүлүгүн белгиледи.
Адылбек Касымалиев ишкерлер отчет тапшырууда кездешкен кезек күтүү, электрондук системалардын иштөөсүндөгү мүчүлүштүктөр сыяктуу көйгөйлөрдү тез арада жоюуну тапшырды.
Отурумдун жыйынтыгында минкаб башчысы фискалдык органдын ишмердүүлүгүнө ар тараптуу талдоо жүргүзүүнү тапшырды жана министрлер кабинетинин төрагасынын буйругу менен ЭТТК кигизүүнүн жана жөнөкөйлөтүүнүн жыйынтыктарын изилдөө жана Мамлекеттик салык кызматынын ишин андан ары өркүндөтүү боюнча сунуштарды иштеп чыгуу үчүн атайын комиссия түзүлөөрүн билдирди.