16:06, 24 декабря 2024, Бишкек - 24.kg
Кыргызстандын аймагында 285 ак илбирс байырлап жатат. Бул тууралуу Ак илбирсти коргоонун эл аралык күнүнүн бет ачарында айтылды.
Эске сала кетсек, БУУ президент Садыр Жапаровдун Эл аралык ак илбирс күнүн белгилөө демилгесин колдогон. БУУнун Башкы ассамблеясынын резолюциясынын негизинде бул жаныбардын жалпы экосистемадагы ролун эске алуу менен аны сактоо боюнча аракеттерди колдоо боюнча эл аралык жана аймактык кызматташтыкты бекемдөө максатында 23-октябрь Эл аралык ак илбирстин күнү деп жарыяланган.
Ак илбирсти жана анын экосистемасын сактоо боюнча глобалдык программанын эл аралык координатору Костуб Шарма айтымында окумуштуулар 125 миң чарчы километрден ашык аймактарды изилдешти. 875тен ашык фотокапкандар орнотулду. Изилдөөнүн жыйынтыгына ылайык, Кыргызстанда 234төн 349га чейин ак илбирстин бар экендиги аныкталды. Орточо эсеп менен ак илбирстин саны 285 деп белгиленди деп айтты.
Ошондой эле Костуб Шарма бул жыйынтыктар экосистеманы коргоо маанилүү экендигин көрсөтөрүн айтып, комплекстүү иштерди жүргүзүү ак илбирстин санын көбөйтүүгө өбөлгө түзөрүн кошумчалады.