Ысык-Атада мыйзамсыз менчиктештирилген 11 социалдык объект мамлекетке кайтарылды
16:02, 29 ноября 2024, Бишкек - 24.kg
Чүй облусунун Ысык-Ата районунда 11 социалдык объект мамлекеттин балансына кайтарылып, жалпы чыгымы 120 миллион 130 миң сомду түздү. Бул тууралуу Улуттук коопсуздук боюнча мамлекеттик комитеттин басма сөз борборунан билдиришти.
«1998-2006-жылдары жеке адам тарабынан мыйзамсыз менчиктештирилип кеткен клубдар, парктар, суу мунаралары, ПОМ жана медпункттун имараттары жана башка объекттер мамлекеттин балансына кайтарылды», — деп айтылат маалыматта.
Көрүлгөн чаралардын натыйжасында жогоруда аталган объектилер ыктыярдуу түрдө мамлекеттин балансына өткөрүлдү. КР УКМК мыйзамсыз менчиктештирилген өндүрүштүк жана социалдык объектилерди аныктоо жана мамлекетке кайтаруу боюнча иштерди улантууда.
