13:22, 29 ноября 2024, Бишкек - 24.kg
Бишкек шаардык кеңешинин жаңы, XXIX чакырылышынын биринчи сессиясы 2-декабрда өтөт. Бул тууралуу БШКнын сайтында айтылат.
Депутаттар борбор калаанын мэриясынын жыйындар залына чогулушат.
БШКнын регламентине ылайык, биринчи сессияны жаш курагы боюнча эң улуу депутат ачып, шаардык кеңештин төрагасы шайланганга чейин алып барат.
Шаардык кеңештин биринчи сессиясынын күн тартибине төраганы, төраганын орун басарын шайлоо, фракцияларды каттоо жана алардын лидерин аныктоо, туруктуу комиссиялардын тизмесин, алардын курамын жана төрагаларын бекитүү жана уюштуруунун башка маанилүү маселелери кирет.
Бул чакырылышта депутаттардын саны 51ге чейин көбөйтүлдү. Административдик-аймактык реформага чейин 45 депутат болгон.
Эске сала кетсек, 6-сентябрда президенттин «Жергиликтүү кеңештерди таратуу жана жергиликтүү кеңештердин депутаттарын шайлоону дайындоо жөнүндө» Жарлыгы чыккан. 17-ноябрда 33 шаардык жана 231 айылдык кеңештердин депутаттарын шайлоо болуп өттү.
Борбор калаада шайлоо босогосун беш партия аттады: «Жаңы күч — жаңы күч» (17 мандат), «Эмгек» (12), «Адилет» (8), «Ынтымак» (8) жана «Эл үмүтү» (6) ).