14:06, 22 ноября 2024, Бишкек - 24.kg
«Кыргыз темир жолу» ишканасынын кондукторлору айлык акынын аздыгына нааразы болуп, эл өкүлдөрүнө кайрылышты. Бул тууралуу Жогорку Кеңештин «Мекенчил» депутаттык тобунун жыйынында депутат Бакытбек Марипов билдирди.
Анын айтымында, мамлекеттик ишкананын кызматкерлери бүгүнкү күндө 20 миң сомдон алышат.
«Вагондордо жылуулук жок. Кондукторлордун айлыгын көтөрсө, от жылыткычтарды жалдаса болобу?». — деп сурады Бакытбек Марипов.
«Кыргыз темир жолу» мамлекеттик ишканасынын башкы директорунун орун басары Дастан Усубакунов келерки жылы жетекчилик кондукторлордун айлыгын көтөрөрүн билдирди.
«Вагондордо жалаң механиктер жана кондукторлор бар. Акыркылар унааларды өздөрү жылытат, бул үчүн кошумча төлөм бар», — деп жооп берди чиновник.