Профсоюздар федерациясы тарабынан 2 млрд сомдон ашык мыйзам бузуулар аныкталды

18:08, 04 ноября 2024, Бишкек - 24.kg

Эсеп палатасы Кыргызстан профсоюздар федерациясынын ишмердүүлүгүн текшерүүнүн жыйынтыгында 2 миллиард сомдон ашык каржылык мыйзам бузууларды аныктады. Бул тууралуу ведомствонун басма сөз кызматы билдирди.

Президенттин тапшырмасы боюнча 2013-2022-жылдарга тематикалык аудит өткөрүлдү. Анда санаторийлерди, пансионаттарды жана башка кыймылсыз мүлктөрдү сатуу жана менчиктештирүү, ошондой эле баштапкы профсоюз уюмдарында арендалык мамилелерди жана мүчөлүк акылардан түшкөн каражаттардын пайдаланылышын текшерүү маселелери каралды.

Текшерүүнүн жүрүшүндө 2 миллиард 58 миллион 585 миң сомдук жана 25,6 миң долларлык каржылык мыйзам бузуулар аныкталган.

«Профсоюздар жөнүндө» мыйзамдын 21-беренесине ылайык, алар уставдык ишин камсыз кылуу үчүн гана өздөрүнүн мүлкүнө жана каражаттарына ээлик кылууга, пайдаланууга жана тескөөгө укуктуу. Бул документтин эң маанилүү шарты — профсоюздук ресурстар элдик байлык болуп саналгандыктан, менчиктештирүүгө жатпайт.

Ошого карабастан, Профсоюздар федерациясы мыйзамда белгиленген чектөөлөргө каршы өз карамагындагы 86,58 гектар жерди сатып жиберген.

Белгиленген мыйзам бузууларды эске алуу менен Башкы прокуратура жана УКМК тарабынан сатылган жер тилкелерин Профсоюздар федерациясынын менчигине кайтаруу боюнча азыртан чаралар көрүлүүдө. Мурдагы жетекчилер жеке колго өткөрүп берген бардык мыйзамсыз ажыратылган ресурстар жумушчуларга кайтарылууга тийиш.

Аудиттин жыйынтыгы боюнча отчет Эсеп палатасынын Кеңешинде угулуп, кабыл алынды. Жыйынтыгы президентке, башкы прокурорго, УКМКга жана ФПКга жөнөтүлдү.