11:07, 08 октября 2024, Бишкек - 24.kg
Бишкекте Баңгизаттарды мыйзамсыз жүгүртүүгө каршы күрөшүү кызматынын кызматкерлери тарабынан 34 жаштагы А.Д. баңгизаттарды таратуу каналын уюштурууга шектелип кармалды. Бул тууралуу КР ИИМ басма сөз кызматы билдирди.
Маалыматка ылайык, кармалган адам коомдук фонддордун биринин Биринчи Май району боюнча кураторунун орун басары болуп иштейт.
Баңгизаттарды мыйзамсыз жүгүртүүгө каршы күрөшүү кызматынын кызматкерлерине белгисиз адам көптөн бери баңги затын сатуу менен алектенип, Токтогул районунан Чүй облусуна туруктуу канал ачкандыгы тууралуу маалымат берген. Аталган факты боюнча КРнын Кылмыш-жаза кодексинин «Баңги каражаттарын, психотроптук заттарды жана алардын аналогдорун сатуу максатын көздөбөстөн мыйзамсыз даярдоо» беренеси боюнча иш козголгон.
Ыкчам кызматкерлер шектүүнүн өздүгүн аныкташкан. Ал Бишкектин Сүйөркулов жана Юнусалиев көчөлөрүнүн кесилишинен кармалган 34 жаштагы А.Д. аттуу адам убактылуу кармоочу жайга киргизилип, тергөө иштери уланууда. Тинтүү учурунда кармалган жарандан жалпы салмагы 23,81 граммды түзгөн гашиш салынган эки ширенке кутучасы табылган. Укук коргоо кызматкерлери бул кылмыштын башка катышуучуларын аныктоо иштерин жүргүзүүдө.