16:45, 30 сентября 2024, Бишкек - 24.kg
Транспорт министрлиги Кыргызстандагы эң узун тоннелдин курулушу кайсы этапта экенин билдирди.
Ведомствонун басма сөз кызматы белгилегендей, Көк-Арт ашуусу аркылуу өтүүчү тоннелдин курулушун 1-декабрда бүтүрүү пландалууда. Деңиз деңгээлинен 2 миң 500 метр бийиктикте курулуп жаткан объектинин узундугу 3 миң 890 метр, туурасы 10,6 метр, узартылган тилкелеринин узундугу 14 метр, бийиктиги 8,5 метрди түзөт.
«Тоннелдин ичиндеги жол тилкесинде асфальт-бетон төшөө иштери аяктап жатат. Бул жерде жарык берүүчү жана желдетүүчү турбиналар орнотулуп, электр кабелдерин орнотуунун акыркы этабы жүрүп жатат. Порталдын дубалдарын бүтүрүү иштери уланууда. Жакынкы күндөрү жол сызыктарын түшүрүү иштерин баштоо пландалууда», — деп билдирди Транспорт министрлиги.
Мекеме тоннелдин кире беришинин алдына асфальт төшөө иштери дээрлик бүтүп калганын кошумчалады. Убактылуу жолдун кар көчкү түшүү коркунучу бар беш бөлүгүнүн төртөө бетондоо иштери аяктады.
«Учурда курулуштардын четтерин таш менен бекемдөө иштери жүрүп жатат. Тоннелге жакын жайгашкан жерлерге парапет орнотуу иштери башталды. Курулуш иштеринин жана материалдардын сапаты техникалык шарттарга ылайык «Кыргызжолтранспроект» мамлекеттик ишканасынын консультанты тарабынан көзөмөлдөнөт», — деп белгиледи басма сөз кызматы.
Ведомстводон билдиришкендей, Жалал-Абаддан Балыкчыга чейинки альтернативдик жолдун жалпы узундугу 433 чакырымды түзөт. Эки эстакадалык көпүрө бүткөрүлүп, 1 тоннелдин жана чыгышындагы курулушу уланууда.