14:27, 25 сентября 2024, Бишкек - 24.kg
Шайлоо жана референдум өткөрүү боюнча борбордук комиссиясы 17-ноябрга белгиленген жергиликтүү кеңештердин депутаттарын шайлоону даярдоо жана өткөрүү боюнча сметаны бекитти. Бул тууралуу БШКнын сайтында айтылат.
Анда 495 миллион 718,4 миң сом суммасындагы чыгымдардын сметасына шайлоо мыйзамдарында мамлекеттик бюджеттен каржылоо каралган иш-чаралар камтылган.
Алардын ичинен:
201 млн 880,6 миң сом — шайлоону уюштурууга борборлоштурулган чыгашалар: маалымат, окуу комиссиялары, байланыш, маалыматтык материалдарды басып чыгаруу, шайлоо жабдууларын, шайлоо документтерин жана таркатма материалдарды аймактарга жеткирүү ж.б.
293 млн 837,8 миң сом — 56 аймактык шайлоо комиссияларынын жана 2 миң 439 участкалык шайлоо комиссияларынын ишин камсыз кылууга.
23-сентябрга карата алдын ала маалымат боюнча республикада 4 миллион 114 миң 931 шайлоочу бар.
Бир шайлоочуга кеткен чыгымдын суммасы 120,46 сомду түздү.
БШК белгилегендей, Министрлер Кабинетинин 2023-жылдын 14-августундагы № 468-р буйругуна ылайык, шайлоону каржылоодо айкындуулукту, ачыктыкты жана отчеттуулукту камсыздоо максатында «Борборлоштурулган бухгалтердик эсеп» автоматташтырылган маалыматтык системасы жана шайлоо комиссияларынын мүчөлөрүн жана тартылган кызматкерлерди каржылык колдоо ТИК жана БИК колдонулат, бекитилген смета боюнча накталай эмес формада «РСК Банк» ААК жана «Айыл Банк» ААК банк мекемелери аркылуу жүзөгө ашырылат.
Эске сала кетсек, 6-сентябрда президенттин «Жергиликтүү кеңештерди таратуу жана жергиликтүү кеңештердин депутаттарын шайлоону дайындоо жөнүндө» Жарлыгы чыккан. 484 жергиликтүү кеңеш таркалууга тийиш. 249 жергиликтүү кеңештин депутаттарын шайлоо (тизме шилтемеде) 17-ноябрга белгиленди.