13:05, 25 сентября 2024, Бишкек - 24.kg
Жогорку Кеңештин жыйынында депутат Балбак Түлөбаев УКМКнын башчысы Камчыбек Ташиевге кайрылып, Суу чарба, айыл чарба жана кайра иштетүү өнөр жай министрлиги тарабынан суу менен камсыздоо долбоорлорунун аткарылышын текшерүүнү суранды.
Депутаттын айтымында, ратификацияланган келишимдер ведомство тарабынан жай жана начар аткарылууда.
«Бир убакта департаментке дренаждарды тарткыла, арыктарды тазалагыла деп айтышкан. Бирок мунун баары өтө жай жасалат. Жер кодексин алып келишти, а Суу кодекси кайда? Алар даярданууну суранышты. Бул документтерди кабыл алсак, көп маселелер чечилмек. Бардык ратификацияланган келишимдер жай аткарылып жатат. Сиздин подрядчылар начар иштешет. Камчыбек Кыдыршаевич, суу менен камсыздоо долбоорлорун карап көрүңүз. Алар иштебейт, көзөмөл жок. УКМКдан башка бөлүмдөр иштейби?!» — Балбак Түлөбаев ачууланды.
Депутат Суу чарба жана өнөр жай министрлиги үч жылдан бери Ысык-Көл облусунун Тоң районундагы ички каналды оңдоп-түзөөдөн өткөрө албай жатканына нааразы болду.
Жогорку Кеңештин жыйынында депутаттар Эл аралык өнүктүрүү ассоциациясынан (Дүйнөлүк банктын кредиттик уюмуна кирген) «Айылдарды суу менен камсыздоону жана канализацияны туруктуу өнүктүрүү» долбооруна Кыргызстанга 7,64 миллион доллар кошумча каржылоо боюнча макулдашууну ратификациялоону талкуулап, жактырышты.
Кыргыз Республикасынын суу чарба, айыл чарба жана кайра иштетүү өнөр жай министринин биринчи орун басары Жаныбек Керималиев баяндама жасады.