18:08, 06 сентября 2024, Бишкек - 24.kg
2025-жылга чейин Бишкек-Москва багыты боюнча эл аралык жүргүнчүлөрдү ташуучу поезддин ишин жандандыруу пландалууда. Бул тууралуу Транспорт министрлигинин басма сөз кызматы билдирди.
Мекеме коронавирустук чектөөлөр киргизилгенден кийин Бишкектен Москвага эл аралык жүргүнчүлөрдү ташуучу поезд каттабай калганын эскертти. Пандемиядан кийин Самарага (Россия) темир жол каттамдары жанданды.
«Пандемиядан кийин Москва темир жол түйүнүн масштабдуу реконструкциялоо иштери башталып, Россия Федерациясынын борборуна жүргүнчүлөрдү ташуучу поезддердин каттамдары Кыргыз Республикасында гана эмес, КМШнын башка өлкөлөрүндө да убактылуу токтотулду», — деп белгиледи Транспорт министрлиги.
2025-жылга карата поезддердин жаңы графигине ылайык, Бишкек — Москва эл аралык жүргүнчүлөрдү ташууну жандандыруу пландалып жатканын кошумчалады.